Ben Sir真人確實有幾分似周星馳，從一頭略灰的三七分界秀髮，到語調、節奏，再到時而嚴肅，時而幽默的表達方式。可能受「星爺」影響，心底裏，他最想做「大娛樂家」，50歲終於得償所願。

眾所周知，博士Ben原是薪高糧準的中大高級講師，最初從小學體育老師做起，一路進修，順着專業向pay scale跳級而上。2017年因市場熱熾呼喚，他本着「輸唔晒」、「跌唔死」的心態毅然轉型做藝人，憑搞笑加才華成為新一代「師奶殺手」。

從「推job」到「跳出來」

除了拍廣告「搵快錢」，「貪玩」的他過去幾年亦不斷cross-over電視、電影、棟篤笑、舞台劇都試過。不再「打工」後，除了實踐夢想，他亦重覓「生活」，時間彈性到weekday可約同學仔去camping，望滿天繁星。

可以過這種「又賺又玩」的寫意生活，他強調，是建基於過去30年儲下的「本錢」。「最初那十幾二十年，要有discipline，裝備好自己，用健康換金錢，是辛苦的。」

務求做到，第一，有一把利刀，磨到極至。「姑勿論你係做freelance定slash，有幾多份工，你始終要有一瓣嘢係比較堅實，人地搶你唔到，唔係散收收咁。例如一個人玩航拍玩得叻，你要去鑽研果樣嘢，睇時機，不斷碰撞。」

BenSir這個博士笑匠品牌亦非一步到位。當年高考成績未能升大學，他轉讀教育學院做小學老師，之後一路愈讀愈精，進修至博士，下苦功鑽研「廣東話」，才晉身語言學家。及至配合自身幽默本色，在「粗口學堂」大放異彩。

不識字   未必能識人

坊間說「識人好過識字」，Ben Sir不認同，「識字代表你做出成績，咁樣人地先會黐埋嚟，或者俾你去識。」

第二，財務穩健，減低風險。「買樓，買定唔買呢？某位大學校長好浪漫，話唔好俾層樓困住，我心諗，你自己好多層樓就叫人要浪漫！」調轉思考，他認為買樓亦會令人腳踏實地，因「不能躺平，有個方向、有個目標」。

Ben Sir二十出頭已上車，當時亦很艱難，「首期9萬蚊，我唔夠錢，要同老婆一人夾一半。」之後樓換樓不斷升級，現時有樓有舖的他，人生走到「輸得起」的階段。

現在買樓首期最少要五、六十萬，他建議年輕人要孝順父母，促進親子關係，「係有實際回報的」。

他不贊成「裸辭」，除非「計得掂條數」。當初放棄穩定收入看似兵行險着，實情他已打好算盤，想好退路。「我哋無仔女，最大鑊係供樓，一、兩層，老婆是小學老師，睇返風險唔大。」

「假使我剩低搵錢時間多唔過在中大做，只要搵得夠快，當你同一舊錢，我都係贏。」他與太太有共識，「快錢」用來還房貸，換自由。

【照片攝於天后Preface Coffee】

節錄自1月號《信報財經月刊》